O PSdeG esíxelle á Xunta a mellora do equipamento do IES do Milladoiro

Vicente Docasar apunta os escasos equipamentos didácticos nun centro de nova construción con eivas sinaladas en equipamento informático e infraestruturas

O portavoz de Educación do Grupo Socialista, Vicente Docasar, esixiulle hoxe ao goberno galego a mellora do equipamento do IES do Milladoiro, posto en marcha no curso 2013-14 e que aínda arrastra carencias denunciadas pola comunidade educativa. Docasar levou a situación deste centro que atende á zona mais poboada de Ames, con 14.000 habitantes, á Comisión de Educación.

O responsable socialista lembrou que “hai orzamento e diñeiro” para que o centro poida recibir os equipamentos didácticos dos que a día de hoxe carece, así como o material informático que necesita e que se lle teñen sido negados por falla de cartos. Sinalou que “si é certo, como din, que a crise quedou atrás logo ten chegado o momento de subsanar estas eibas”.

Criticou a “falla de previsión” demostrada polo goberno galego neste centro, que vai mais alá das “comprensibles carencias propias dun centro de nova creación”, con problemas nos accesos ou o peche da pista deportiva. Reclamou que a Xunta cumpra coas promesas de mellora das instalacións realizadas grazas ao “efecto balsámico das eleccións municipais”.

Docasar explicou que tanto a comunidade educativa –o profesorado, a Anpa e mesmo os estudantes- como o Grupo Socialista teñen trasladado as necesidades deste centro, especialmente con relación ás carencias de persoal docente, equipamento didáctico escaso e limitado, acondicionamento do exterior ou o peche da pista polideportiva, que imposibilita “calquera tipo de actividade cando as condicións climatolóxicas son adversas”.

Reclamación da Anpa
Desde que abriu as súas portas o IES de O Milladoiro esta é unha reclamación constante da comunidade escolar, apoiada desde o comezo polo Grupo Socialista de Ames; o cal mantivo varias xuntanzas coa Anpa e coa dirección do centro para coñecer de primeira man estas carencias.

Deja un comentario

Tu dirección de correo electrónico no será publicada. Los campos obligatorios están marcados con *

Este sitio usa Akismet para reducir el spam. Aprende cómo se procesan los datos de tus comentarios.