Solicitan incluír no POS 2013 melloras no saneamento, un aparcadoiro en Aldea Nova e o arranxo do acceso ao colexio Alca

obras

O grupo municipal socialista de Ames presentará na vindeira sesión plenaria a súa proposta de obras para incluír no Plan de Obras e Servizos do ano 2013 e que inclúe melloras no saneamento de varias parroquias, a construción dunha zona de aparcamento en Aldea Nova e o arranxo do acceso ao colexio Alca. Unha solicitude que os socialistas presentarán directamente ao pleno despois de que o alcalde Santiago Amor nin sequera dera resposta á petición socialista de convocar unha Xunta de Voceiros para conformar unha proposta conxunta dos tres grupos municipais.

Para o voceiro do grupo socialista, José Miñones, “o señor Amor volve a demostrar unha vez máis a súa prepotencia e que está pechado a todo o que signifique diálogo e negociación a prol do benestar dos veciños e veciñas de Ames, pois nin sequera se dignou a contestar a unha petición dunha Xunta de Voceiros que presentamos por escrito hai hoxe un mes para ver de acordar a mellor proposta para a veciñanza amiense”. Unha petición que foi rexistrada o pasado 7 de novembro de 2012 e que non recibiu resposta algunha por parte da Alcaldía.

Seguridade viaria en Biduido

A proposta do grupo municipal socialista para o POS 2013 inclúe obras de gran interese para a seguridade viaria dos nenos e nenas que acoden ao colexio ALCA. Así, os socialistas solicitan o arranxo da pista que sae da rotonda de Biduido de Abaixo e remata o colexio ALCA. “O firme está moi deteriorado e, coa choiva e a cantidade de vehículos que pasan por aló a diario, a situación é un completo caos en moitas ocasións”, explica Xosé Miñones.

Ademais, os socialistas solicitan a construción dunha beirarrúa dende o colexio ata a rotonda para impedir que os nenos e nenas teñan que camiñar pola estrada, co perigo que supón para eles pois teñen que circular entre os vehículos particulares e os autobuses por unha pista moi estreita. Unha situación que supón un risco potencial moi importante para os usuarios e usuarias deste centro educativo, como quedou de manifesto hai unhas semanas cando unha ambulancia non puido acceder ao colexio para evacuar a un rapaz ferido leve polos vehículos aparcados nas marxes da pista. Por iso, os socialistas tamén solicitarán ao Concello de Ames
que, noutra partida orzamentaria diferente ao POS 2013, incremente a área de aparcamento na zona negociando co propietario da parcela situada xusto diante do colexio.

Saneamento

A segunda obra proposta para o POS 2013 é a continuación do plan de saneamento nas parroquias de Trasmonte e Agrón. Unhas obras que incluirían o remate da rede de sumidoiros nos núcleos de Sorribas e Suevos (na parroquia de Trasmonte) e en Piñor e Ponte Maceira (parroquia de Agrón).

A terceira e última obra sería a construción dunha zona de aparcamento xunto ao edificio de usos múltiples de Aldea Nova, que en breve comezará a funcionar. “Trátase dunha zona na que case non hai sitio para aparcar e sería intelixente ser previsores e evitarlles o problema aos usuarios deste edificio antes de que se poña en marcha”, sinala José Miñones.

Deja un comentario

Tu dirección de correo electrónico no será publicada. Los campos obligatorios están marcados con *